Siumut illersornissamut isumaqatigiissummi immikkoortoq 2-ip nutaamik isumaqatigiinniutigineqarnissaa kissaatigaa
All.: Ane Lone Bagger, Siumut tunuliaqutaralugu folketingimut qinigassanngortittoq
Siumut illersornissamut isumaqatigiissummi immikkoortoq 2-ip, Kalaallit Nunaanni Issittumilu sakkutooqarnerup annertusineqarnissaanut tunngasup, nutaamik isumaqatigiinniutigineqarnissaa kissaatigaa
Siumut annertuumik geopolitikkikkut isumannaallisaanerup annertusineqarnissaanut piffissami nalorninartumiinnitsinni pisariaqartitsineq paasilluarpaa, kisianni erseqqissaatigaa isumaqatigiissut maannakkut atuuttoq Kalaallit Nunaanni pissutsinut – pingaartumik kommunit inissisimanerannut – naammattumik isiginiarneqarsimanngitsoq. Isumannaallisaanerup annertusarnissaa tapersersorparput, kisiannili taamaattoqassaaq Kalaallit Nunaat kommunillu piviusumik peqataatinneqarlutik inissinneqarlutik – isiginnaartuinnartuunngitsoq.
Siumumiit immikkut oqaatigiumavarput ajornartorsiut pingaarutilik tassaasoq kommunit aalajangiiniarnermi naammattumik peqataatinneqarsimannginnerat, naak najukkani kingunerisassat tigussaasut piffinni tigummineqaraluartut. Tamanna ilaatigut ineqarniarnermut, attaveqaasersuutinut aammalu isumaginninnermut tatisinerulernermik kinguneqartoq.
Pingaarnertut Siumup tikkuarusuppaa pilersaarusiornermi inissianik pilersitsinissaq pilersaarutigineqarmat Danmarkimit sakkutuut tikittussat ilaqutaallu eqqarsaatigalugit, tamatumalu peqatigisaanik Nuummi inissiat amigaataanerat annertoreersoq. Ajorluinnarpoq tikeraanut ilaqutariinnut inissiat salliutinneqassappata, Nuummi innuttaasut amerlasuut naleqquttunik inissaqartinneqanngitsulluunniit.
Najukkani pisariaqartitat salliunneqartariaqarput Siumumit erseqqissarusupparput.
Siumup aamma erseqqissarusuppaa inissiinerit allat pimoorussisumik eqqarsaatigineqartariaqartut – ilaatigut Narsarsuaq ilanngullugu, tassani attaveqaasersuutit piusut atorluarneqarsinnaanerat periarfissaalluni. Isumaqarpugut aaqqiissutissat soorlu Narsarsuup ilanngunneqarnissaa sukumiisumik misissorneqartariaqartoq. Tamanna Nuummi artukkiineq annikillisissinnaavaa aammalu ineriartortitsineq nalimmassarneqartoq qulakkeerlugu, sakkutuullu illoqarfissuarmiit qimagutitinneqarlutik
Taamatuttaaq pingaaruteqarpoq illersornissamut tunngasut suliassallu Kalaallit Nunaanni sineriak tamakkerlugu siammarterneqarnissaat. Taamatut periuseqarnikkut ataatsimut isumannaallisaaneq nunallu nakkutigineqarnera nukittorsarneqassaaq, kiisalu nunaqarfiit avinngarusimasut ineriartortinneqarnissaat tapersersorneqassalluni aammalu sumiiffiit amerlanerit najugaqarfiusinnaanngorlugit. Sineriak tamakkerlugu ingerlallunilu peqataanermik pilersitsinikkut najugaqarnerup tapersersorneqarnissaa qulakkeerneqarsinnaavoq, taamaalilluni Kalaallit Nunaanni sumiiffiit inuerunneqannginnissaat, ajornartorsiutaalersinnaasut imaluunniit navianartorsiulersinnaasut pinngitsoortinneqarlutik.
Siumumiit erseqqissarusupparput apeqqut iluarsiissutaaginnarani aammali Kalaallit Nunaanni namminersornermut aammalu naalagaaffeqatigiinnermi oqimaaqatigiinnerup ataqqineqarnissaa pillugu apeqqutaasoq. Taamaammat Siumumiit nutaamik isumaqatigiinniarnissamik kissaateqarpugut ukununnga tappiffilimmik:
• Kommunik siusissukkut pimoorussisumillu peqataatinneqarnissaq
• Danmarkimi Kalaallit Nunaannilu oqartussaasut akornanni naligiimmik suleqatigiinneq
• Aningaasartuutaajumaartunut najukkani erseqqissumik aningaasanik malitseqartitsineq
• Suliassat suliniutillu najukkami tunngaveqarnerulernissaat
• Piffinni najugallit ineqartinneqarnissaat tikillutik suliartortuniit salliunneqarnissaat
Issittumi isumannaallisaaneq nukittorsassagutsigu, piffinni tapersersorneqarneq pisariaqartinneqarpoq. Taanna tapersersorneqarneq aatsaat pilersinneqarsinnaavoq peqataatitsinikkut, ataqqinninnikkut innuttaasullu pisariaqartitaasa salliutinneqarnerisigut.
Siumumiit kaammattuutigivarput danskit naalakkersuisut illersornissamik isumaqatigiissut immikkoortoq 2 isumaqatigiinniutigeqqullugu, isumaqatigiissummilu qulakkeeqqullugulu, isumannaallisaanermi annertusaaniarnermi, Kalaallit Nunaata nammineersinnaassuseq ataqqillugu kiisalu Kalaallit Nunaanni sinnerani naligiimmik ineriartortitsineq pilersillugu – najukkani inuiaqatigiinnut mianernartunut artukkiinngitsumik.