Danmarkip Kalaallit Nunaat ullumikkut pissarsiarisartakkatsinnit annerusumik akiitsoqarfigaa

All.: Aka Hansen, Siumut tunuliaqutaralugu folketingimut qinigassanngortittoq

Kalaallit Nunaat Danmarkillu akornanni pissutsit pillugit oqallinneq tapiissutitigut
aningaasaqarnermillu apeqqutinut saatsinneqartuartarpoq. Kisianni oqaluttuaq taanna
ajoraluartumik pisariitsunngortitaavoq, aammalu pingaarnerusumik ilumoortoq annertuumik
isiginiarneq ajorpaa: Danmarkip Kalaallit Nunaat ullumikkut pissarsiarisartakkatsinnit
annerusumik akiitsoqarfigaa.

Ukiut ingerlaneranni Kalaallit Nunaata pisuussutai Danmarkimi inuiaqatigiit atugarissaartut
pilersinneqarnerannut peqataasimapput. Peqatigisaanillu politikkikkut aalajangiinerit
Danmarkimi ingerlanneqartut Kalaallit Nunaanni inuit inuunerannut annertuumik
sunniuteqarsimapput – inuiaqatigiinnikkut, kulturiatigut aningaasatigullu. Kingunerit,
ullumikkumut suli inuuffigisut.

Aningaasat pillugit oqaluuserinnikkutta, akisussaaffik pillugu aamma
oqaluuserinnittariaqarpugut.

Danmarkip oqaluttuarisaanermi politikkikkullu akisussaaffigaa aaqqissuussinerit
kolonialitsiarnerup kingorna pilersinneqarsimasut. Tamanna ilaatigut atugarissaarnerup
assigiinngissusia, inuiaqatigiinni pingaarutilinni aningaasaliissutit amigaataanerat kiisalu
kalaallit innuttaasunut – Kalaallit Nunaanni Danmarkimiillu – tunngatillugu
uppernarsarneqarsimasut annertuumik sumiginnakkat.

Aningaasat kisimik pineqanngillat. Uannut tamanna naapertuilluarnerup pilluguuuvoq.
Isumaqarpunga ersarilluinnartoq, uagut akornanni pissutsit Kalaallit Nunaata
ineriartortinneqarneranut aningaasaliinernik, politikkikkut aalajangiinitsinnut ataqqinninnermik
aammalu kukkunerit pisimasut aaqqinniarneqarnissaannik piumassuseqarnermik
imaqartariaqartut.

Oqaluttuaq, Kalaallit Nunaat aningaasatigut artukkiinerusoq, qimattariaqarparput.
Kalaallit Nunaat tassaavoq nuna pisuussutinik, periarfissanik innuttaasunillu, aalajangiinerit
nammineq sinerissatsinniunngitsoq aalajangiiffigineqarsimasut kingunerinik
nammakkersuisimasunik. Oqimaaqatigiinneq taanna utertinneqartariaqarpoq.
Taamaattumik oqariartuutiga ersarippoq: Danmarkip Kalaallit Nunaat annerusumik
akiitsoqarfigaa aningaasaqarnikkut tamannalu Siumumiit qinneqqusaarutigivarput.
Piffissanngorpoq tamanna pillugu oqallinneq pimoorullugu aallartinneqassasoq –
Folketingimi ilanngullugu.