Kalaallit Nunaanni Politiit arsaarinnissutaasa aningaasartai nunatta karsianut nakkartariaqarput

All.: Doris J. Jensen, aaqqissuussaanikkut siulittaasup tullia folketingimullu qinigassanngortittoq

Folketingimut qinigassanngortittutut isumaqarpunga, politiit nunatsinni akiligassiissutaasa arsaarinnissutaasalu nunatsinniit pisut Danmarkimut nakkaratik nunatta karsianut nakkartalernissaat pisariaqartoq.

Ullumikkut Kalaallit Nunaanni politiit akiligassiissutaat arsaarinnissutaasalu aningaasartaat Danmarkimut nakkartarput. Tamanna allanngortariaqarpoq.

Akiligassiissutit arsaarinnissutillu nunatsinni inuiaqatigiinnit pilersinneqartarput. Kalaallit Nunaanni innuttaasut akiligassiissutinik akiliisarput, aammalu pigisat nunatsinniittut arsaarinnissutigineqarlutik akitsorterunneqarlutik tunineqartarput. Taamaakkaluartoq aningaasat Danmarkimut nakkartarput, politeeqarneq Danmarkip akisussaaffigimmagu.

Tamanna naapertuilluanngilaq.

Aningaasat taakku nunatsinni atorneqarsinnaagaluarput, ingammik pinerluttulerinermut pinaveersaartitsinermut iluaqutaasinnaallutik.

Assersuutit:

   •   Arsaarinnissutigineqartut soorlu umiatsiat, snescooterit biilillu akitsorterunneqarlutik tunineqartarput

   •   Aningaasat nunatsinni missingersuutini takuneqarsinnaanngillat, naak nunatsinni pilersinneqartaraluartut

Peqatigitillugu nunatsinni pinerlunneq Danmarkimiit annertuneruvoq. Taamaattumik pinaveersaartitsinermut annertunerusumik aningaasaliissuteqartoqarnissaa pisariaqarpoq.

Aningaasat ullumikkut nunatta avataanut nakkartartut atorneqarsinnaagaluarput:

   •   Pinerluttulerinermut pinaveersaartitsinerup nukittorsarneranut

   •   Meeqqanut inuusuttunullu suliniutinut

   •   Ilaqutariinnut pisariaqartitsisunut siusissukkut ikiorsiisarnermut

   •   Nunaqarfinni illoqarfinnilu toqqissisimatitsinermut

Taamaattumik sulissutigissavara:

   •   Politiit akiligassiissutaasa arsaarinnissutaasalu nunatsinniit pisut nunatta karsianut nakkartalernissaat

   •   Aningaasat qanoq annertutigisut pillugit erseqqissumik paasissutissiisoqarnissaa

Pinerluttulerineq annertuneruppat, pinaveersaartitsinermut aningaasaliissutit aamma annertunerusariaqarput. Tamanna pisariaqartitsivoq aningaasat nunatsinni pilersinneqartut nunatsinni atorneqarnissaannik.

Tamanna tassaavoq akisussaaffik, naapertuilluassuseq aammalu nunatsinni pilersinneqartut nunatsinni inuiaqatigiinnut iluaqutigineqarnissaat siunertaralugu.