Sinerissap naligiinnerusumik ineriartortinneqarnissaa iliuuseqarnermiittariaqalerpoq

Qujanartumik ukiuni kingullerni sinerissap naligiinnerusumik ineriartortinneqartariaqarneranik oqariartuuteqartarnerit annertusiartortutut ipput, tamanna ilaatigut Inatsisartuni oqallittarnerni erserpoq aammalumi kommuunini borgmesterit arlariit tamanna oqariartuutigisarlugu.

Oqallinnerinnaasanngilarli! Iliuuseqarnermik timitaliinermillu nassataqartariaqarpoq!

Qinigaaffiup nutaap aallartinnerata kingorna Naalakkersuisunut apeqquteqaatit arlariit ingerlappakka, tassanilu erserpoq kommuunit aningaasatiguinnaanngitsoq atukkamikkut assigiinngitsutigut annertuumik naligiinngittoqartoq aammalu kommuunit akornanni aningaasaqarnikkut naligiinnginnerup ilumut piunera Inatsisartut Naalakkersuisullu tamarmik arajutsisimanngikkaluaraat isumaqarlunga.

Kommuunit akornanni naligiinnginneq annertusiartuinnartoq ilisimagaluarlutigu taamaattussaannartut akuerisutut illutigu isiginnaaginnarparput, utoqqatsissutigalutigu innuttaasut sumi najugaqarusunnerat politikkikkut aqunneqarsinnaannginneranik tunngavilersuuteqartoqartarluni. Taamatut tunngavilersuuteqartarneq isumaqatiginngilara. Ilaatigut pissutigalugu isumaqarama pisortat suliffeqarfiutaasa sumi inissisimanissaannik politikkikkut aalajangerneqarnerisa aalajangertaraa innuttaasut sumi najugaqassanersut.

Assersuutigiinnarlugu pisortat suliffeqarfiutaat Tusass, Nukissiorfiit, Royal Greenland, Royal Arctic Line, Air Greenland, Visit Greenland, Greenland Airport, Sikuki Nuuk Harbour, Nalik Ventures, Asiaq, ilinniarfiit, Naalagaaffiullu susassaqarfii assigiinngitsut Nuummi inissisimanngikkaluarpata qularnanngitsumik taakkua sulisorpassui ullumikkut Nuummi najugaqarsimanavianngikkaluarput.

Nalinginnaasuuvormi innuttaasut ilinniakkaminnut tulluartumik akissarsiagissaarnerusumillu periarfissaminnik toqqaasarnerat, soorlu qanga siulivut piniagassat malillugit inuusimasut.

Eqqaamaneqassaarlu suliffeqarfiit privatimik pigineqartut taamak amerlatigisut Nuummiinnerannut pissutaaqataammat, pisortat suliffeqarfiutaasa siuliani pineqartut Nuummiinnerat. Taakkuullutillu akileraarutitigut kommuunimut annertuumik isaatitsilluartut. Taamaattumik innuttaasut sumi najugaqarnissaat qanorluunniit politikkikkut qanoq aalajangertoqarsimaneranik sunnerneqartarpoq imaluunniit aalajangerneqartarpoq.

Nunatsinni illoqarfiit pingaarnersaata ineriartortuarnissaa aammalu nukittuumik inissisimanissaa inissisimajuarnissaalu pingaarteqaara, taamaattorli nunatta sinnera naligiinnerusumik ineriartortinneqarnissaa aammalu  kommuunit allat aamma inuusuttunik ilinniarsimasunillu najugaqarfigineqarsinnaajuaannarnissaat pingaaruteqarluinnartoq isumaqarpunga.

Aap nalimmassaarutitigut kommuuninut  agguaassisoqartarpoq, taamaattorli naligiinnerulernissamut ataatsimoortumik tapiissutitigut nalimmassaarisarneq kisimi aaqqissutissatut isigineqarnissaa mianersuuttariaqarpoq, tassami ilinniarsimasut aamma taakkuusarmata sumiiffimmi ulluinnarni inooqataanikkut pingaarutilimmik inissisimallutillu annertuumik sutigut tamatigut kivitseqataasartut.

Taamaattumik nunaqqatigut aamma sinerissamiittut neriuummik ineriartornermullu peqataatinneqartutut misigisimanermik tunisariaqarpagut. Tamattami nunatta tamarmi ingerlalluarnissaa soqutigisariaqarparput, oqaannarata innuttaasut sumi najugaqarnissartik namminneq aalajangertarmassuk tamanna allanngortinneqarsinnaanngitsoq. Tamanna uagut kalaallit ileqqorinngilarput.

Taamaammat upernaamut Inatsisartut ataatsimiinissaanni oqaluuserisassaq tassunga tunngasoq ingerlateqqippara, neriullunga oqaluuserisassatut akuersissutigineqarumaartoq.

Sineriak naligiinnerusumik ineriartoqatinneqartoq qineqqusaarutaanaanani timitalerneqartariaqalerpoq!

Anders Olsen, Inatsisartunut ilaasortaq, Siumut