AVANERSUAQ AAMMA INOQARPOQ

INUUSSUTISSANIK, ATORTUNIK KIISALU AALISARNERMI PINIARNERMILU ATORTUNIK PILERSORNEQARTUSSANIK!

Uagut Avanersuarmi tamarmi najugaqartunut qinikkatut sinniisutut qinigaanikuusugut Avanersuup inuussutissatigut, piniarnermi atortutigut, atisatigut inuuniarnermilu pisariaqartutigut pilersornerlunneqarnera akuerisinnaanngilluinnarparput. Umiarsuaqaqqinnissatsinnut suli qaammatit tallimat, inuussutissalli atortullu inuuniarnermi pisariaqartut nungoralereernikuupput.

Sungiusimaannalernikuuarput nioqqutissat qaammaterpassuarni qaangiinikut inuussutissatut pisiarineqartarneri, assersuutigiinnarlugu Siorapalummi igaassat maanna tamarmik qaangiinikuupput, Savissivimmi piniarnerinnarmik inuuniarfiusumi piniarnermi atortunik pisiassaqanngilaq, pisiniassagunik kujammut piniartariaqarput, nalinginnaasuuvorlu timmisartuaqqap Savissiviliartup ilaanni ullorpassuarni kinguaattoorfiusarnera.

Amigaatinik kissaatinik allattuinata, assersuutit ilagiinnarpaat; issittorsuarmi najugaqarluta Qaanaami aalisarnermik piniarnermillu inuuniarfiusuni inersimasunut kaminnik oqortunik pisiassaqanngimmat. Taamaattumik nioqqutissatigut pilersorneqarfituatsinnut inussiarnersumik sakkortuumillu piumasarivarput inuussutissanik inuuniarnermilu atortussanik pisariaqavissunik immikkut ittumik tikisitsinissaq naammasseqqullugu.

Politikkikkullu akisussaasut kaammattorpagut maani Avanersuarmi innuttaasut inuussutissatigut atortutigullu inuuniarnermi pisariaqartutigut pilersorneqarnitta pitsaanerusumik aaqqiivigineqartariaqarneranut suleqataaqqullugit. Erseqqissaatigilaaginnarlugu; sulisunik maani ataatsimilluunniit tikkuartuinnginnatta, taakkunannga pitsaasumik sullinneqartarnerput nuannersuusarmat. Pilersorneqarnermili aaqqitassaqarpoq.

Avanersuarmi sumiiffinni ukunani qinikkat: Maassannguaq Oshima, Siorapaluk/Qeqertat siulittaasoq Naduk N. Kristiansen, Savissivik siulittaasoq Ujuut Olsen, Avanersuup kommunerinikuusaani kommunalbestyrelsimut qinigaq