Naalakkersuisunut allakkat ammasut
KNI A/S-ip ingerlatsinera Siumup innuttaasunut ernumanartippaa
KNI A/S aningaasartuutinik ikilisaanermi nassuiaateqarnermigut nioqqutissat assigiiaat arlallit
ikilisarlugit nalunaaruteqarnikuuvoq, maannalu innuttaasut orulluteqarneri imaaginnavipput,
ilaatigut sinerissap ilaani juullimut nioqqutissat naammannaviarnatik. Maanna juulleriartornerani
juullip pisatai amikkisaarunneqartut aamma saqqummerpoq, saniatigut Pilersuisoqarfinni akit
qaffariarput tamannalu immini najugaqartunit nammakkuminaattorujussuuvoq
inuuffigiuminaassiartuaartitsisuullunilu.
Naak §37 naapertorlugu apeqqutigineqarsimasumut normu 108 23. Oktober 2025 Naalakkersuisut
kiffartuussinermi isumaqatigiissummi eqquutsitsinissaq nakkutigissallugu
akissuteqarsimagaluartut tusagassiorfitsigut oqariartuutigineqartut ajorsiartuinnartutut
isikkoqarput.
Inoqarfinnut minnernut pilersuisussaatitaanermillu pisussaaffimmik suusupaginninneq ersarittoq
Siumut isumaqarpoq, soorluttaaq najugaqarfinni minnerni inuussutissaqannginnerusut
amerlanerit nioqqutissatut pigilerneqarsimasut, tamannalu najukkani allamut
pisiniarsinnaanermut periarfissaqanngitsunut innuttaasut peqqissusaannut
innarleeqataasinnaavoq, tamannalu kiffartuussinermi isumaqatigiissutikkut KNI A/S-ip
pisussaaffimmisut naammassisassaraa, piviusulli akisussaaqataassuseqarnermik ersersitsinngitsut
Siumut isumaqarpoq.
Soorluttaaq § 37 naapertorlugu Lars Poulsenip apeqqutaanut normu 085-mut akissutigineqartumi
KNI A/S nunatta karsianut piginnittuminut agguagassarsisitsisinnaasimanngitsut ilagivaat.
Maannalu inuiaqatigiit ingerlatseqatigiiffiutaannut aqutseriaaseq atorneqartoq ilungersunartutut
Siumup isigaa.
Siusinnerusukkut Naalakkersuisut Siulittaasuata ingerlatseqatigiiffiit ukiaanerani immikkut ittumik
ataatsimeersuartinneqarnissaa nalunaarutigaa, tamannalu qaqugu ingerlanneqartussatut
takorloorneqarnersoq Siumup paaserusuppaa.
Siusinnerusukkut allagarisimasatta Tunumi nioqqutissat juullimut angummatinnginnissaat pillugit
kingornatigut Naalakkersuisup ingerlatseqatigiiffiit attuumassutillit oqaloqatiginiarlugit
nalunaaruteqarpoq. Taassumali kingorna aaqqiissutissamik saqqummiisoqanngilaq taamaammallu
ilanngullugu suliap sumut killinnera Siumumiit paaserusupparput.
Lars Poulsen, Siumut