Inussuk pillugu suliamut paasissutissat Kommuneqarfik Sermersuumi qinikkanut isertuunneqarpat?
Tusatsiakkat, tusagassiutitigullu tusartakkat, eqqoriaanerillu politikkikkut sulinitsinni akueriinnarsinnaannginnatsigit Siumut Sermersuup gruppia sukumiisumik tunngavissalinnillu paasissutissanik suliamik takunnissinnaanikkut qulakkeerinnikkusuppoq – politikkikkut akisussaassusilimmik ingerlatsinissaq pisariaqarmat.
Siullermik Inussuk pillugu NCD-ip kingornalu kommunep suliarisimasaat tamakkiisumik qinikkanut saqqummiunneqarnikuunngillat.
Taamaattumik tusagassiutitigut aatsaat paasissutissat apuuttartut tusatsiakkallu naammaginnginnatsigit Sermersooq Siumut gruppe Suliamut takunnissinnaanermik piumasaqarpugut inatsisitigut tunngavilimmik.
https://nalunaarutit.gl/groenlandsk-lovgivning/2017/l-29-2017?sc_lang=kl-GL
Kommunit aqunneqarnerat pillugu Inatsisartut inatsisaat: § 12. Kommunalbestyrelsimut ilaasortaq kinaluunniit qinikkatut sulinerminut atatillugu suliassap aalajangersimasup inaarutaasumik inerneranik kommunip allaffeqarfiani inissisimasumik misissuataarisinnaatitaavoq.
Suliamik takunnissinnaaneq: Atuarfik Inussuk pillugu paasissutissat aatsaat susoqaraangat apuuttartut amigartutut isumaqarfigigatsigit Suliamik takunnikkusulluta maana noqqaassuteqarpugut.
NCD-ip suliaq tigummigallarmagu suliarinnittussat NCD-lu akornanni attaveqatigiittarsimanerit pillugit paasissutissatut perusuppagut aamma Inussummut attuumassutillit NCD-miit suliarineqarsimasut tamaasa.
Taakku saniatigut NCD-ip matoreernerata kingorna Inussuk pillugu kommunep sanaartortullu akornanni attaveqatigiittarsimanerit paasissutissallu tassunga attuumassutillit tamaasa ilanngullugit suliamut takunnissinnaanermik piumasaqarpugut.
Qaammatit marlungajaat utaqqivugut. Suliamik takunnissinnaanermut piumasarput 8. oktober 2025 qulaani allaqqasoq nassiupparput. Taannalu kommunemi suleriaaseq malillugu ullut suliffiusut qulit ingerlaneranni akineqartussaagaluartoq ulloq manna tikillugu suli akineqanngilaq?
Oktober naalersoq 27/10-2025 pisortaanermiit aperineqarpunga suut perusunnerigut, soorunami suliamut tunngasut takunikuunnginnatsigit inatsit tunngaviusoq innersuutigaara, uterfigineqarnissarpullu neriorsuutigineqarpoq.
3/11-2025 susoqanngimmat inatsillu tunngaviusoq malinneqanngimmat akineqarnissamik noqqaalluta saaffiginneqqippugut borgmester ilanngullugu aamma susoqanngilaq?
11/11-2025 saaffiginneqqippugut toqqorleraattoqanngimmat qinikkatut pisinnaatitaaffipput malillugu suliamik takunnikkusulluta, neriorsorneqarpugut piareersarneqartoq?
24/11-2025 suli suliamut takunnissinnaanermut qinikkatut inatsisitigut tunngavilimmik piginnaatitaaffipput suusupagineqarpoq.
Tamanna qanoq paasisariaqarnerpoq. Nalunngilarpummi Inussuk pillugu suliaq annertuumik tamanik kalluaasoq, minnerunngitsumik atuartunik, angajoqqaanik aammalu ilinniartitsisunik, sulisunillu allanik taamaammat naatseersuutigilluinnarsimagaluarparput Kommuneqarfik Sermersooq pimoorussilluni qinikkat sulinerminni paasissutissanik tamakkiisunik ujartuinerat peqataaffigalugu suleqataanissaa.
Ajoraluartumilli uuma pisup takutippaa qalliinnakkut paasissutissiisarneq Kommuneqarfik Sermersuumi aqutsisuniit orniginartinneqarnerusoq – Sooq?
Eqqaamasariaqarparput kikkut pillugit qinikkatut sulinerput – tassalu innuttaasut akileraartartut atuisugullu!
Inussiarnersumik inuulluaqqusilluta
Peter Davidsen, Sermersooq Siumut sinnerlugu.