Partiip qullersaqarfiani pilersaarutit malillugit Siumut nutaamik pisortaqarnikkut aaqqissuussivoq
Partiip qullersaqarfiani pilersaarutit malillugit Siumup Siulersuisuuneri nutaamik pisortaqarnikkut aaqqissuussipput.
Siumup allattaaneratut ulloq oktoberip naggataat 2025 aallarnerfigalugu Ole Aggo Markussen atuuffeerutissaaq. Ole Aggop ukiorpassuarni partiimut sullissisimaneranut, partiip ingerlanneqarneranut qitiusumik inissisimalluni suleqataaneranut, siulersorneqarneranut qullersaqarfiullu ineriartortissimaneranut, Siumumit qutsavigaarput.
Partiip allattaaneranut novemberip aallaqqaataat 2025 aallarnerfigalugu Aviaja Hegelund-Tittussen atorfeqalissaaq. Aviajap partiip aaqqissuussaanikkut inissisimaneranut aammalu ingerlanneqarneranut misilittagaqarluarpoq, qullersaqarfiullu immikkoortortaqarfiit peqatigalugit ineriartorteqqinnissaanut ingerlatitseqqiissalluni.
– ”Ole Aggop ukiorpassuarni tunniusimalluni sulisimaneranut qutsavigaara. Maannalu Aviaja piginnaaneqarluarmat ataqatigiissaarillaqqissuummallu suleqatiginissaanut qilanaarpunga. Pisoq eqqissisimasumik partiip ineriartornera tunngavigalugu ingerlanneqarpoq.” taama oqarpoq Aleqa Hammond Siumup siulittaasua.
Aleqa Hammond, Partiformand for Siumut