Isuma

Allannguutit ajorseriartitsinatik pitsanngoriaataasussaapput

Siumut 54 Views
Aleqa Hammond. Ass.: Siumut.

Siumup akuersaanngilaa isorliunerusuni nioqqutissanik kiffartuussinernillu ajorseriaateqartitsiniartoqarnera. Allannguutit pitsanngorsaataasussaapput – ajorseriaataasussaanngillat

All.: Aleqa Hammond, siulittaasoq, Siumut

Qinersivik ataasiuvoq, innuttaaqatigiinneq ataasiuvoq, Inatsisartut ataasiupput aammalu Naalakkersuisut Nunarput ataasiusutut isumagalugulu kiffartuuttussaavaat. Inuiaqatigiinnik naligiissumik isigisumik naalakkersuinikkut ingerlatsinissaq pisariaqarteqaarput.

Allannguisoqassatillugu allannguisassaagut pitsanngorsaatissat tungaannut. Maannakkut isorliunerusuni nioqqutissaqarnikkut pilersuinikkut oqariartuutigineqarpoq pilersuinikkut ajorseriaateqassasoq, tassagooq ammasarfii sivikillisinneqariarlutik nioqqutissat ikinnerusut kisiisa aallaavigalugit ingerlatsisoqassasoq. Tamanna Siumumiit sakkortuumik akerlilerparput akuersaarsinnaanagulu oqariartuuteqarluta. Innuttaasut inuuniarnikkut atugaatigut ajorseriaataasussanik siunniunneqartut peqataaffigisinnaanngilluinnarparput, taamaammat Naalakkersuisut akulerullutik aaqqiissutissatigut pitsaasumik nassaarniarnermi partiit tamaasa suleqatiginnissutigisaanik pitsanngoriaatissatigut tikkuussinissaq ujartorneqassasoq isumaqarpugut.

Isorliunerusut aammalu nunatta avannaani nunaqarfippassuaqartuni niuernikkut periarfissarpassuaqanngitsumi neqeroorutinillu takuffiorpianngitsumi najugaqartut pisiniarfeqarnikkut toqqagassarpassuaqanngillat. Ilisimaneqartutuut atortussatigut pilersorneqarneq pitsaanerpaaffimmiinngilaq ukiunilu arlalissuanngortuni pilersuinikkut isumaginninneq amerlasuutigut maalaarutigineqartarpoq aammalu pilersuinikkut ingerlatsinikkut pitsanngorsaasoqartariaqarneranik oqariartortoqarpoq. Ullutsinni pisiniarfik kisiat isumalluutigalugu aningaaseriveqarnikkut, allakkeriveqarnikkut allatigullu isorliunerusuni najugaqartunut ajorseriaateqarnikooqaaq.

Maannamut oqariartuutigineqartut sipaarniarnermi isorliunerusut suli eqqornerlunneqartinneqarnissaat sakkortuumik isumaqatiginagu matumuuna suaarutigaarput. Killormuanik naalakkersuinikkut aqutsinermi nunatta inuisa atukkatigut pitsanngorsaavigineqartariaqarluinnarnerat ujartorparput. Isorliunerusut aalisarnikkut nunatsinnut aningaasatigut annertuumik isaatitsiviupput killormuanillu ajorseriaataasunik maannamut suli atugaqarnissaannut siunnerfeqarneq unitsilluinnarneqartariaqarpoq.

Ukiuni kingullertigut isorliunerusut angallannikkut atugassatigut ilungersunartumik atugaqariartuinnartut arajutsisimanngeqaagut aammalu tunitsiveqarnikkut atukkatigut ilungersunarsiartuinnartutigut atugaqartinneqartut. Tamanna killormut saatikkumallugu Siumup tungaaniit erseqqissumik suliniuteqarumalluta pitsanngorsaajumallutalu suliumavugut.

Siumut piareersimavoq pilersuinikkut eqaallisaanikkut peqataassalluni minnerunngitsumillu innuttaasut sumi najugaqaraluarpataluunniit naligiissinneqarlutik kiffartuussivigineqarnissaat qitiutillugu suleqataaniarluta oqaatigissuarput.

Assartuussinikkut eqaallisaaneq, pisariaqartitat aallaavigalugit niuernikkut ingerlatsineq, inuussutissarsiuteqarnikkut siuarsaaneq, tunisassiorfeqarnikkullu annertusaaneq aqqutissiuusseqataaffigiumallugu suliumavugut.

Pitsanngorsaataasussanik allannguisoqartarpoq, allannguinerit innuttaasut atugaannut ajorseriaataasut naaggaarpavut.