Martha Abelsen Siumumit ataatsimoorfigaarput, Kommuneqarfik Sermersuummilu borgmesterissatut qinigassanngortipparput. Tatiginartumik, unneqqarissumik inatsisillu attuuttut naapertorlugit ingerlatsineq Kommunitsinnut uterteqqinneqassaaq.
Siumumit inatsisit toqqammavigalugit aqutsinermillu ilisimasaqarluartumik borgmesterissatut sassartitsivigut ataatsimoorfigalugulu.
Arnaavoq aqutsinermik ilisimasaqarluartoq, nukittooq, sapiissuseqartorlu.
Martha Abelsen Siumumit ataatsimoorfigaarput, inatsisinillu atuutsitsinissamut unneqqarissusermullu borgmesteritut qinigassanngortipparput isumaqaratta aqutsisut akornanni eqqissisimanermik toqqissisimanermillu pilersitsisinnaasoq ataavartumillu aaqqiissutissanik nassaarsinnaasoq.
Qinigaaffiup siuliani annertuumik toqqissisimannginnermik imaqarpoq. Inatsisaatsuliornerillu initusimaqaat innuttaasunut sullissinissaraluami kommunip iluani aaqqissuussinernut atorneqarmata.
Uanilu qinigaaffimmi Siumumit sulissutigissavarput innuttaasut qitiutillugit kommune sullisseqqilernissaa.
Kommune ineriartortoq siunnerfigaarput, aamma inoqarfinni allani.
Qeqertarsuatsiaaniikkuit, Arsummiikkuit Tiniteqilaamiikkuit illoqarfinniluunniit kommunerisatsinniikkuit ineriartornissat qulakkeertuassavarput.
Nuummilu ineriartortuarneq ingerlatiinnassavarput, taannaavorlu Nunatta avammut kiinnerneranut annertuumik ilusiliisoq. Nunaminertalli annikilliartortillugit pisariaqarpoq pilersaarusiorluakkamik ineriartorfissanik tikkuussissalluta. Tamanna innuttaasunik peqataatitsinikkut aaqqissuutissavarput.
Kommunimilu piukkunnarluinnartunik sassartitaqarpugut. Ineriartoqqinnissamut tikkuussisunik.
– Borgmesterissatut tatigineqarlunga unneqqarinnermillu ingerlatsinissanut pisussaaffilerneqarnera piareersimaffigilluinnarpara suleqataaffigiumallugulu. Pingaarnertullu kommunitsinni inoqarfiit tamarmik ineriartoqqinnissaannut innuttaasut peqataatinnerullugit katataqarnata ingerlaqqinnissaq Siumumit pingaartilluinnaratsigu, Martha Abelsen oqarpoq.