Naalagaaffinngornissamik oqallinneq annertusiartuinnartoq malinnaaffigalugu nuannareqaara, uangattaarlumi anguneqarnissaa suleqataaffigissavara.
All.: Poul Olsen, Inatsisartunut Siumut sinnerlugu sassartoq
Ernummatigisarali uaniippoq. Politikimik oqallinneq eqqortoq aallaaviginagu amerlasuunit eqqartorneqarpoq. Politiki misigissutsit aallaavigalugit naalagaaffinngornissaq sukkasuumik anguneqarnissaa amerliartuinnartunit siunnerfigineqartutut misinnarpoq.
Maanna Danmark qaninnertut suleqatitut inissisimavoq, tamannalu tamavitta isumaqatigiissutigigunarparput allanngortariaqartoq. Tamannali eqqarsarluarnikkut pilersaarusiorsimanikkullu ingerlattariaqarparput, misigissutsit aquttorinagit, qarasarli misilittagaareersullu ilinniarfigalugit ingerlattariaqarparput.
Ukiorpassuarni Danmark upperiuarsimavarput nunatsinnut pitsaasussaq anguniarlugu suliniuteqartuusoq. Tamannali takusinnaajartuinnavipparput allarpassuarnik aamma nassuiaasersorneqarsinnaasoq, iliuuserineqartarsimasullu ilaat akuersaarneqarsinnaanngilluinnartut. Aap tamakku kamaammernartorujussuupput.
Eqqarsarluartali, kamannitta politikerput aqussanngilaa. Kamak aqqutigalugu piaarnerpaamik namminiilivinnissarput anguniarsarissanngilarput. Isumatusaartumik eqqarsarluarlutalu suleqatissatsinnik misissuissaagut. Naalagaaffinngorniartilluta USA uukapaatitsiniartoq tunniutiinnarfigissanngilarput.
Nunarsuatsinni kisermaassillutik naalakkersuisut pissaanermut inissinniarnerminni pissuserisartagaat kingumut qiviaraanni, maanna USA-p præsidentiata pissusilersuutai navianarluinnarput. Allaammi eqqartuussiveqarneq sanngiillisarusuppaa, inatsisit imminerminit appasinnerutikkusullugit.
Taamaammat kalaaleqat, eqqarsarluaqqaarta, eqqarsarluaqqaarutta tuaviupilunnermit annaasassaqannginnerussaagut.
Maanna politikerit avissaartuutsitsiniarsaripput misigissutsit, kalaallit kamaqarnerat atornerlullugu ingerlatsiniartoqarpoq.
Politikerit marlunnut avinneqarsinnaasutut isikkoqarput. Misigissutsit atorlugit kalaallit uummataannik tiguaaniarsarisut, qanorluunnit akeqaraluarpat maannakkorpiaq naalagaaffinngorumasut, allaat kalaallinik illersuinnginneraallutik aporfissalersuineraallutillu tusaaqqusaartut tusaavagut.
Illuatungaanilu eqqarsarluarnikkut suleqatissarsiornikkut inuiaat ulluinnarni ajornartorsiutaannik aaqqiiniarlutik ilungersuuteqartut. Kalaallit amerlanerpaartaat naalagaaffinngorumasut qularinngivippara. Eqqarsarluarlutali allorassaaqatigiinnerulluta angusassaq ataatsimoorluta anguniarutsigu annaasassakinnerussasutut isikkoqarpoq.
USA qissimigaarpallaarnagu, allanik oqaloqateqarnissaq pisariaqarpoq. EU, tassunga ilanngullugu Danmark aamma Island tunngavilimmik suleqatigineqarluarsinnaapput, kimmullu Canada suleqatigineqarluarsinnaalluni. Periarfissat tamaasa oqaloqatigiissutigilaartigit. Qarasarput ajoquteqanngilaq, tamatta qarasarissorsuuvugut, iluamilli atortariaqarparput.