Piffimmi politikkerit Ittoqqortoormiit eqqaanni mittarfeqalernissaq qaqittarsimagaluarpaat iluamilli oqartussaasunit Naalagaaffimmiit aamma nunatsinni naalakkersuisuusarsimasuniit maannamut naammattumik tusaajumaneqaratik. Nalunngilara Naalakkersuisut pineqartoq eqqumaffigigaat aamma sanaartornissaq imminut akilersinnaasutut nalilerneqartartoq. Siumut Sermersuummiit isumaqarpugut upperalugulu, Ittoqqortoormiit nunatsinnut tamakkiissumik utertinneqarnissaa, Naalagaaffiup Naalakkersuisullu akisussaassuseqarlutik aaqqiiffigissagaat.
All.: Peter Davidsen, Sermersuummi Siumut sinnerlugu
1920-kkuni Naalagaaffik Norgelu Kangiata avannaarsua (tunup avannaarsua) pillugu aaqqiagiinngissuteqareerlutik Naalagaaffiup Ittoqqortoormiit 1924-mi tunngavilerpaa, inunnik Ammassallimmeersunik Uummannallu eqqaaneersunik nuussinikkut.
Taamaalilluni inunnik nuussinermigut Naalagaaffiup naqissuserpaa, Kangiata avannaarsuani oqartussaassuseqarnini.
Taamanikkut inuit nuutsinneqartut ullumikkut kinguaavi Kangiata avannaarsuani avinngarusimalluinnartumi angallannikkut attaveqaatitigut naammagittangaarlutik inooqataapput, tamanna allanngortariaqalerpoq.
Piffimmi politikkerit Ittoqqortoormiit eqqaanni mittarfeqalernissaq qaqittarsimagaluarpaat iluamilli oqartussaasunik Naalagaaffimmiit aamma nunatsinni naalakkersuisuusarsimasuniit maannamut naammattumik tusaajumaneqaratik.
Piffissanngorpoq Naalagaaffiup Naalakkersuisullu Ittoqqortoormiit eqqaani mittarfeqalernissaq isumaqatigiissutigissallugu.
Tassami periarfissaqareerpoq Nunatta nunarsuarmioqatigiinni illersoqatigiinnissami sunniuteqarnerata annertusiartornera ilutigalugu, Ittoqqortoormiit Kangiata avannaarsuani mittarfittaarnermigut angallannikkut aamma ilisimatusarnermi qitiunissaa.
Ittoqqortoormiit Kangiata avannaarsutata illersornissaanut angallannikkut attaveqaatitigut qitiutinneratigut illoqarfimmi inuussutissarsiornikkut allatigullu siuarsaanissaq periarfissaalissaaq, tassami nalunngilarput aamma uumassusilinnik pisuussuteqarluartut taamaattorli angallannikkut aporfissat illoqarfimmi ineriartortitsinissami killilersuipput.
Siumumiit isumaqarpugut upperalugulu, Ittoqqortoormiit Kangiata avannaarsuanik Naalagaaffiup piginnittussaaneranik naqissusiisut “paarsisullu” angallannikkut allatigullu atugassarititaasutigut pitsaanerusumik atugassaqartinnissaat pillugit, Naalagaaffiup Naalakkersuisullu akisussaassuseqarlutik aaqqiiffigissagaat.