– AAMMALI PISORTAT KIFFARTUUSSIVII SINERISSAMIITTUT NUKITTORSARNEQARLUTILLU PILERSEQQINNEQARTARIAQARPUT.
Ulluinnarni innuttaasorpassuit kommuuniniit kiffartuunneqarnerat aammalu oqartussaaqataanerat amerlasuutigut ajorseriaateqarsimasoq uppernarsarneqareerpoq. Taamaammallu kommuunerujussuanngortitsisimaneq piffiit ilaannut iluatsissimanngitsoq eqqarsaatigalugu kommuunit ilaat pisussaaffeqarput tamassumap aaqqissuuteqqinnissaannut innuttaasut qanimut peqatigalugit suliarissallugu – tamanna aamma Kommune Kujallermi suliassaavoq!
All.: Anders Olsen, Inatsisartunut Ilaasortaq, Siumut
Nunatta kujataani kommuunit aaqqissuuteqqinneqarnissaat eqqarsaatigalugu Kommune Kujalleq tassaasariaqarpoq siuttuulluni iliuuseqartussaq, tamannami Naalakkersuisuniit suleriaasiusariaqartoq erseqqissumik oqariartuutigineqareerpoq.
Nunatta kujataani kommuunit arlariinngoqqinnissaat qularnanngilaq, tamannali naammanngilaq.
Ilisimavarpummi aamma pisortat kiffartuussivii sinerissamiittut ilaatigut nungulluinnanngikkunik nungulluinnalersut. Naak suliffeqarfiit inuiaqatigiit pigisaat tassaasussaasut nunaqartuusunut tamanut qanimut kiffartuussisussat – sumi najugaqartuuneq apeqqutaatinnagu.
Nanortalik assersuutigigaanni: Inissiaatileqatigiiffik INI A/S piujunnaarpoq, TUSASS piujunnaarpoq, nakorsaqarniarneq ilungersunarsivoq, politiit amerlassusaat nungungajapput, eqqartuussivik allaffissornerinnakkut ullup affaa kiffartuussileqqavoq, palaseqanngilaq, ilinniartitsisunik amigaateqartuarneq piuvoq allarpassuillu.
Taamaammat kommuunit aaqqissuuteqqinneqarnissaasa saniatigut Naalakkersuisut Naalakkersuisunngortussallu pisortat kiffartuussiviisa pilerseqqinneqarnissaannik nukittorsaaqqinnissaanillu suliaqartariaqarnerat avaqqunneqarsinnaanngilaq, taamaaliornikkut sinerissap inukilliartornera ilorraap tungaanut aallaqqissinnaasoq naatsorsuutigigakku.