Ajuusaarnarpoq KNR-ip tusagassiortuanit apersorneqarnitsinni akissutigisagut qulequtsiussami minnerpaannguamilluunniit ilanngunneqarsimanngimmata. Tamanna illuinnaasiortumik tusagassiinertut taaneqarsinnaavoq
All.: Frantz Lundblad & Karl Thue Nathanielsen, Qeqertalimmi kommunalbestyrelsimut ilaasortat, Siumut
Aap, juni 2022 aamma august 2022 ataatsimiisitaliami Inuit-ni (inunnik isumaginninnermi ataatsimiisitaliaq) aamma ataatsimiisitaliaq Inua (aningaasaqarnermut ataatsimiisitaliaq) ataatsimiinnitsinni kommunip sussaqarfiini assigiinngitsuni aningaasaliissutinik sippuisoqartussaaneranik ilisimatinneqarpugut. Aattaalli aningaasat sippukkat amerlassusaat aningaasaqarnermut ataatsimiititaliamut 19. oktober 2022 paasissutissiissutigineqarput, aningaasanik sanaartugassanit ingerlatsinermiillu nussuisoqartussanngormat.
KNR-imi allaaserineqartarsimasut uani alakkakkit.
Isumaqarpugut una paasissallugu pingaaruteqartoq. Ataatsimiissutini oqaluuserisassatut ilaanngillat, ataatsimiinnerulli naalerneranni paasissutissatut ilaatinneqarput. Ataatsimiinnermi paasissutissiissutigineqartut tigussaanerusumik oqallisigineqarneq ajorput, aamma annerusumik allannguinermik kinguneqarneq ajormata.
Qinikkat ataatsimiissutissaasa imarisai qinikkanut qanoq oqaasertalerneqarsimallutik tunniunneqarsimaneri pingaarutilerujussuusarput, taakkuusarmatami atorfilittat peqqissaartumik misissuisimallutik suliarisartagaat, agguaanneqannginnerannilu borgmesterimit takuneqaqqaartartussat. Ajoraluartumillu juni 2022 aamma august 2022 ataatsimiissutissani oqaasertaliussat peqqissaartumik misissorneqarsimarpasinngillat.
Juni-mi Inuit ataatsimiinneranni kommunip sussaqarfiini ataasiakkaani sippuisoqarsimaneranik ilisimatitsinermi inassuteqaatitut allanneqarsimavoq sippuisoqarsimaneranik ilisimatitsineq ”ilisimatitsissut tusaatissatut tiguneqassasoq”.
Taamatuttaarlu august 2022 ataatsimiisitaliaq Inua (aningaasaqarnermut ataatsimiisitaliaq) ataatsimiimmat paasissutissat taakkua ilaasortanut apuuteqqinneqarput, aamma paasissutissatut. Tamatumuuna kommunimut aningaasaqarnikkut kingunissai oqaasertalerneqarsimallutik, ”2022-mut missingersuutit ataatsimut attanneqarsinnaasut naatsorsuutigineqartoq”.
Paasissutissanik taamaattunik qinikkat pisimatilluta soorunami upperalugit isigisimavagut. Annertuumimmi ernumassutissaqarsimagutta oqaasertat taamaattut atorneqartussaanngimmata.
Kisianni maannamut assut eqqarsarnarpoq ataatsimiisitaliap Inuit siulittaasua pisorpassuit aallartimmatali nissappallannguamilluunniit tusarfigineqarnikuunngimmat. Taannaavormi siulittaasuunermigut akisussaanerpaaq. Aamma taannaasarpoq ataatsimiisitaliap siulittaasuatut kommunimi pisortat borgmesterilu ilaatillugit kvartalmøde-mi peqataasartoq. Taamaammat siulittaasoq uagut ilaasortat ilisimasatsinnit annerujussuarmik ilisimasaqartartuuvoq. Kommunit aqunneqarnerannut inatsit malillugu tassani siulittaasoq susassaqarfimmini aningaasaliissutinik sippuisussanngornermini aningaasaqarnermut ataatsimiisitaliamut qinnuteqartartussaavoq. Uanilu taamaaliorsimanngilaq. Nammineq susassaqarfigisami siulittaasuuffigisamilu taamak annertutigisumik sippuisoqarsimatillugu sunaveersaarneq nipaannerlu tupinnartorujuupput.
Tusagassiortup qulequtsiussaa tapersernaraluarpoq una. Tassa illuatungeriit aaqqiiniaallutik iliuuseqarfiginerusariaqarsimagaluaraat. Kisianni tamanna qanoq pisinnaagami siunnersuutit allattoqarfimmullu apeqqutigineqartut akineqarneq ajortut taama amerlatigippata? Aamma eqqaamasariaqarpoq politikikkut suliassat allaat partiip nammineq iluani paasissutigisarnissai pisarsimanngimmat, soorlu uagut IA-miikkallaratta tamanna misigisarnikuugipput.
Isumaqarpugut inunnik isumaginninnermi amigartoorutit kisimik eqqartorneqarpallaartut. Sanaartornermimi immikkut aningaasaliisariaqartarnerit annertuut aamma pisarnikuupput. Tamakkualu kommunip pilersaarutaanut kalluaasarput soorunami.
Erseqqissaatigissuarput parti Siumumut nuunnerput 21 mio.-nik sippuisimanermut taamaallaat tunnganngimmat. Maj 2021 qinigaaffilli aallartimmat qinikkat arlallit kommunimut siunnersuuterpassui tusarfigeqqinneqarneq ajortut akerliuffigalugit partiimit anivugut. Isumaqaratta tamat oqartussaaqataanerannik annertuumik unioqqutitsisoqartoq.