Ukioq 2022 aallartippoq Siumut Naalakkersuisooqatigiinnut illuatungiliuttutut ingerlaneranik aallaavilimmik.
Siumumilu tamatumani pingaartissimavarput illuatungiliunnissarput tunngavilersorluakkamik, akisussaassusilimmik aammalu “uppititsiniaaneriinnavinnermik” inuiaqatigiillu avissaartuunnissaat salliutinnagu kisiannilu uparuagassaasinnaasut pillugit saqqummiussisarnikkut piffissaatillugulu eqqortumik sakkortuuliorsinnaanissaq ingerlattassallutigu, nunarput inuilu pillugit sulissagatta. Inuiaqatigiimmi amerlanerussuteqarluartut, immaqaluunniimmi tamarmik, pisariaqartinnerpaasaat tassaammat politikerit suleqatigiissinnaasut pilersinneqassasut.
Upernaarli Naalakkersuisut Siulittaasuata Siumumut saaffiginnissuteqarnerata kingunerisaanik Siumumi siulersuisuunerit tamarmiusut aamma Inatsisartut gruppe tamakkiisup tunuliaqutsiineratigut Naalakkersuisooqatigiit nutaat pilersinnissaanut Siumut akisussaaffimmik tigusinissaminut nalornissuteqarsimanngilaq, misilittagaqarfigilluareerparpummi. Naalakkersuisooqataalernermilu suut orninneqarnersut aammalu aporfiusinnaasut ilisimaaralugit alloriarneq tiguneqarpoq.
Naalakkersuisooqataanerlu ulloq manna tikillugu ineriartorfiusumik ingerlagaluartoq suli ersarinnerusumik alloriarnernillu anginerusunik ingerlanissarput pisariaqarpoq. Naalagaaffinngornissarmi aamma inuiaat nunaminni nammineq tamakkiisumik oqartussaaffeqalernissaat imminnullu napatilernissaat Siumup anguniagaattut timitalersorneqarnerusariaqarmat.
Kommunini tamani Siumut aamma annertoorujussuarmik ilungersorluni sulivoq sunniuteqaqataanissani inuiaqatigiinnilu pitsaanerusumik atugaqartoqarnissaa timitalersorniarlugu suliuarluni. Taamatuttaaq nunaqarfinni aqutsisut ilungersoqataapput, nunaminni ineriartoqataanissamik sunniuteqaqataanissartillu sulissutigalugu. Tamannalu sunniuteqarluarpoq. Tassami ukiut siuliini nunaqarfinni illoqarfinnilu minnerni taaneqartartuni annerusumik sanaartortoqartarsimanngikkaluartoq maanna allanngortinneqarpoq, soorlu inissianik assigisaanillu sanaartornerit aallartiortorneqalerlutik.
Ukiut siuliini Siumup qinersisorisartagai ikiliartorsimagaluartut allanngortinneqarpoq. Siumumi ataatsimoorneq inuillu ataasiakkaat pineqarunnaarlutik sulineq aallartinneqarpoq, inuiaat nunarpullu pillugu sulineq ingerlanneqalermat. Tamatumalu sapanginnginnissaa pingaarutilerujussuuvoq, anguniakkat aamma siuariartornissaq ingerlatiinnarneqassappata. Ataatsimoornitsigummi aammalu siunnerfiit ersarissut ingerlanneqarnerisigut innuttaasut Siumumi katersuuffeqarnerulernissaat ingerlatarput, aamma Folketingimut qinersinermi siuariarujussuarnerput, partiinilu annerpaajulernerput pisussaaffimmik akisussaammillu annertuumik tunisinera ingerlatissagipput pingaaruteqarpoq.
Nunatsinni suliassarpassuaqarnerput unammilligassarpassuaqarnerpullu ilisimaaraarput. Taamaattumik suleqatigiinnissaq ataatsimoorlunilu kivitseqatigiinnerunikkut anguniakkat tamakku angulertornerusinnaasaratsigit, ukiumi qaangiuttumi uummammik pisumik qutsavigiumavatsigit Siumumi suleqataallutillu akisussaaffimmik annertuumik kivitseqataallutit sulisimanerit pillugu.
Siumut sinnerlugu ukioq 2022-mi suleqataasimasut; innuttaasut tamaasa aammalu tapersersortit immersueqataajuartut, qinikkat, suleqatillu tamaasa uummammik pisumik qutsavigiumavakka, ukiumilu nutaami ajunnginnerpaamik peqqinnermillu kissaallugit.
Erik Jensen
Siulittaasoq, Siumut