Folketingip siulittaasoqarfiata kissaatigisimavaa, arnat inatsisartoqarnermut pingaaruteqarsimasut 30-t qalipaganngorlugit Folketingimi inimi “oqaloqatigiittarfimmi” nivingatinneqassasut. Taakkununnga ilaavoq Ruth Heilmann
Arnat kunngeqarfiup iluani 1915-miit politikikkut pingaaruteqarsimasut 30-t ataatsimiititaliornikkut siunnersuutigineqarsimapput, ataatsimiititaliarlu oqaluttuarisaanermik ilisimatuunit katitigaasimavoq.
– Siulittaasoqarfimmi isumaqarsimavugut, arnat pikkorissut ukiuni 100-ni kingullerni politikikkut sunniuteqarsimasut ilaat nersorniassallugit piffissanngortoq. Qalipakkat nutaat atorlugit inimi oqaloqatigiittarfimmik taagorneqartumi, arnat angutillu qalipakkatut nivingasut oqimaaqatigiinnerusumik inissisimatinneqarnissaat pilersissavarput, tassami angutit amerlanerujussuupput. Qalipakkat arnat pillugit kinguaatsinnut takutitsissapput, taakku ilanngullutik Folketingip sulineranut immikkut pingaaruteqarsimasut, Folketingip siulittaasua, Henrik Dam Kristensen (S) oqarpoq.
Arnat politikikkut pingaaruteqarsimasut 30-t akornanni Kalaallit Nunaanniit aamma Savalimmiuniit marluk toqqarneqarsimapput.
Savalimmiuniit tassaavoq Marita Petersen, partii Javnaðarflokkurinimeersoq. Taanna 1988-imi qinigaaqqaarpoq, Savalimmiunilu arnani siullersaalluni naalakkersuisunut siulittaasuusimavoq.
Ruth Heilmann 1995-imi qinigaaqqaarpoq, nunatsinnilu arnani siullersaalluni Inatsisartunut siulittaasuusimavoq.
Qalipagassat 30-t naammassiniarlugit maanna qalipaasartut pingasut siumut toqqarneqareersimasut unammisinneqassapput.