Ukiaanerani Inatsisartut ataatsimiinnitsinni aalajangiupparput Nunatta Kangiani aappaagu qilalukkanik qernertanik kisitsisoqassasoq. Kisitsinissallu naammassinissaata tungaanut ilisimasortat tusaallugit nungusaataanngitsumik ingerlatsisoqarnissaa kissaatigaara
All.: Lars Poulsen, Inatsisartunut ilaasortaq
Ukiaanerani Inatsisartut ataatsimiinnitsinni aalajangiupparput Nunatta Kangiani aappaagu 2022-mi qilalukkanik qernertanik kisitsisoqassasoq. Tassungalu tunngaviuvoq ukiumi pisassiiffiusumi 2022-2023-mi pisassanik tunniussisoqarsimannginnera.
Naalakkersuisoq kaammattorusuppara aappaagumut kisitsisoqarnissaata tungaanut immikkut pisasseeqqullugu. Ukioq manna 2021-mi immikkut pisassiissutit pisarineqanngitsoortut qaavatigut pisassiisoqassasoq kaammattuutigaara.
Inatsisartut aalajangersimanerat tunngavigalugu Kangiani Qilalukkat kisinneqassapput. Ataavartumik tutsuiginartumillu kisitsisoqartarsimannginnerata kingunerisaanik, ilisimatuut piniartullu akerleriippasissunik nalunaaruteqartarput. Ilisimatuut nungulernerinik oqaluttut, piniartut peqarluarneranik oqalupput.
Taamak ingerlaneq qaangerniarlugu kisitsinermi piniartut ilisimasortatut peqataatinneqarnissaat pingaaruteqarpoq. Aatsaat tamatta suleqatigiikkutta Qilalukkat qasserpiaaneri paaseqqissaarsinnaavagut.
Tassungalu inissitsinnata mianersortumik ingerlatsisoqassasoq isumaqatigaara. Taamaattoq qanorluunniit nungusaataanngitsumik pisassiisoqarsinnaasoq ilisimasortatta oqariartuutigaat. Kisitsinissallu naammassinissaata tungaanut ilisimasortat tusaallugit nungusaataanngitsumik ingerlatsisoqarnissaa kissaatigaara.