Namminersorlutik Oqartussat suliffeqarfiutaat

Namminersorlutik Oqartussat suliffeqarfiutaat nunatsinni nunatsinniillu ingerlanneqassapput — inuiaqatigiinni ineriartornermut naleqqussarneqarsimallutik.

Namminersorlutik Oqartussat suliffeqarfiutaat periarfissaqartillugu sineriammut nuunneqarsinnaanissaat ujartorlugu misissuisoqassaaq. Namminersorlutik Oqartussat suliffeqarfiutaat Danmarkimiittut nunatsinnut nuunneqassapput.

Namminersorlutik Oqartussat suliffeqarfiutaanni assigiinngitsuni pisortanik atorfinitsitsinerni inuiaqatigiinnik ilisimasaqarneq, naleqartitanik oqaatitsinnillu piginnaasaqarlunilu ilisimasaqarneq salliutillugit nalilersuinermi tunngavigineqartassapput.

Inuit piginnaaneri aallaavigalugit ingerlatseqatigiiffinni siulersuisuliisarneq isumagineqassaaq, tamatumani inuiaqatigiinnik ilisimasaqarneq, naleqartitanik oqaatitsinnillu piginnaasaqarlunilu ilisimasaqarneq salliutillugit nalilersuinermi tunngavigineqartassapput.

Namminersorlutik Oqartussat ingerlatseqatigiiffinnut sinaakkutinik ersarissunik siunnerfiliissapput, taamaalilluni inuiaqatigiit sinnerlugit piginnittut sinniisaattut Naalakkersuisunit naatsorsuutigisat innersuussutigisaassullu ingerlaavartumik malinnaaffigineqarlutillu nutarterneqartuarlutik ingerlatsiviuniassammata. Ingerlatsineq tamatigut inuiaqatigiit ineriartornerannut naleqqussarneqarsimassaaq. Taamaammat piginnittuunermut politikiliornermi Siumut peqataavoq, tamatumanilu politikikkut siammasissumik isumaqatigiissuteqarneq tapersersorlugu.

Pisortat suliffeqarfiutaasa akunnerminni ataqatigiissaarinerunissaat avaqqunneqarsinnaanngilaq, soorlu sanaartornerit, nunagissaanerit il. il. ingerlanneqartarnerat eqqarsaatigalugit. Tamanna qulakkeeqqullugu suliffeqarfiit erseqqissumik piumaffigineqassapput.

Siumup pingaartippaa politikikkut isumaqatigiissutigineqartuni sinaakkutit malinnaaffigeqqissaarneqarnissaat, siulersuisuutinneqartunillu aamma malinneqarnissaat avaqqunneqarsinnaanngitsumik piumasaqaataanissaa piumasaralugu.