Nunatsinni pisortat allaffissornerat oqaatsivut atorlugit ingerlanneqassaaq.
Pisortat allaffissorneranni sulisorisat katitigaanerat qaqugukkulluunniit nunami innuttaasut katitigaanerannut naapertuuttumik aaqqissuunneqassaaq. Taamatut inissisimalernissaq anguniarlugu pisortat allaffissorneranni sulisorisat katitigaanerat pillugu misissuisoqassaaq, sumi pitsanngorsaasoqartariaqarnersoq paaseqqissaarumallugu.
Naleqqussaasoqarfiusariaqartuni tamani kalaallit naapertuuttumik amerlassuseqartut atorfinitsinneqarnissaannut pilersaarusiortoqassaaq, aporfiusinnaasut piiarlugit, piginnaanngorsaanerillu pisariaqartinneqartut pilersillugit. Taamatut naapertuilluarnerusumut naleqqussaalluni ingerlatsineq ullormiit ullormut naammassinissaa naatsorsuutigineqarsinnaanngimmat – naapertuuttunngorsaalluni pilersaarutit ukiut sisamakkaarlugit nalilersorneqartarnissaat nutarterneqartarnissaallu pisassasoq Siumup sulissutigissavaa.
Nunatsinni pisortani allaffissornikkut aammalu nutserinertigut aningaasartuuteqartarneq annertooq suli maannamut appariartunngitsoq annikillisinneqarnissaa suliniutigineqassaaq. Tamatumani Namminersorlutik Oqartussani naalakkersuisoqarfinni assigiinngitsuni pisortanik atorfinitsitsinerni inuiaqatigiinnik ilisimasaqarneq, naleqartitanik oqaatitsinnillu piginnaasaqarlunilu ilisimasaqarneq salliutillugit nalilersuinermi tunngavigineqartassapput.
Nutserinermut atortut inuiaqatigiinnit aningaasalersorlugit inerisarneqarnikut qarasaasiatigut, innuttaasunut tamanut ammasumik periarfissiissutigineqarnissaat Siumup anguniassavaa. Taamaaliornikkut innuttaasut akunnerminni allattariarsornikkut aamma paaseqatigiilluarnerunissaat anguniarneqassammat.
Pisortat suliffeqarfiutaasa naqitertittagaat nunatsinni naqitertinneqartarnissaat sulissutigineqassaaq.