Ullut 100-t qaangiunnissaannut naammagittarluta utaqqititaanikuuvugut, tassalu Meeqqanut, Inuusuttunut, Ilaqutariinnullu Naalakkersuisup, Eqaluk Høeghip, oqaaseqarsinnaanngornissaanut. Tamannattaaq ataatsimiititaliani ataqqillugu utaqqinikuuarput. Kisianni pakatsinarpoq piffissarujussuaq utaqqereerluta susoqarniannginnermik oqariartortoqarmat.
Marlunngornermi aggustusip 17-iani kiisami Naalakkersuisoq oqariartussalluni piareersimavoq. Ullaakkut KNR Radio aqqutigalugu perngarluni oqariartorpoq, naalakkersuisoqarfimmi ilisimasatik annikimmata sunarpiaq qanorpiarlu ilusilerlugu ingerlaqqinnissaq ilisimaneqanngitsoq.
Isumaqarnaraluaqaaq Meeqqanut, Inuusuttunut Ilaqutariinnullu Naalakkersuisoq naalakkersuisooqatigiit akornanni suliassaaleqinnginnerpaassasoq. Tassami ilisimasat katersarineqarsimasut arlalippassuit nangittumik iliuuseqartussanik utaqqipput.
Ilamininngui tassaapput Kalaallit Nunaanni innuttaasut peqqissusaannik misissuisimanerit, MIO-p nalunaarusiai, VIVE-p (Det Nationale Forsknings- og Analysecenter for Velfærd) nalunaarusiaa ulloq unnuarlu paaqqinnittarfiit pillugit, Politiit ukiumoortumik nalunaarusiaat, inuusuttut pinerlunniartarnerisa qaffakkaluttuinnarneranik imaqartoq il. il.
– Nangittumik suliassat assersuutigisakka innersuussutigalugit paasisinnaanngilluinnarpara ilisimasat killeqarnerannik oqariartorneq. Nalunaarusiat misissuinerillu naammattut pigivagut, taakkualu takutereerpaat utaqqeqqissinnaanngitsugut. Naalakkersuisut kaasimaartussiaanngillat. Sulillusi aallartinniaritsi, Inatsisartunut ilaasortaq, Doris J. Jensen oqarpoq.