Inatsisartunut ilaasortaq Anders Olsen, Siumut
Inatsisartut suleriaasianni § 37 imm. 1 naappertorlugu Naalakkersuisunut apeqqutit imaattut matumuuna saqqummiuppakka:
(Naalakkersuisut akissutaannut apeqqummut §37 nr. 2021-087 malitseqartitsilluni apeqquteqaqqinneq).
Naalakkersuisunut apeqqutit:
- Naalakkersuisut siumut aalajangereersimappata mittarfiit sanaartorneqarlutik aallatereersut unitsinneqarnissaannik pilersaaruteqartoqanngitsoq, taava misissueqqissaarnerit[1] sumut atorneqarniarpat?
- Nuummi Ilulissanilu mittarfissat 900 mio.kr.-inik naatsorsuutigisamiit akisunerunerat, qanga KAIR-imiit Naalakkersuisuniillu ilisimaneqalerpa? Tassani pineqanngilaq nalaatsornerinnakkut qanga tusagassiuutitigut saqqummiunneqarsimanersut.
- Mittarfinnut silaannakkullu angallassinermi inatsisit ass. isumannaallisaanikkut qanga allanngortinneqarnikuuppat?
- Oqartussat mittarfinnut silaannakkullu angallassinermut piumasaqaataasa sakkortusinerat (myndighedskrav) qanoq mittarfinnik sanaartornernut sunniuteqarpat?
- Mittarfinnut silaannakkullu angallassinernut Inatsisit allanngornerat (ændret lovgivning) qanoq mittarfinnik sanaartornernut sunniuteqarpat?
- Mittarfiliortiternernut tunngavissat allanngorneri (ændrede forudsætninger) qanoq mittarfinnik sanaartornernut sunniuteqarpat?
- Ilaasut qanoq amerlatigisut Kangerlussuarmut tikillutillu aallartarpat?
- Nuummi Ilulissanilu mittarfiit atulernerisa kingorna, sinerissami mittarfiit amigartooruteqarlutik ingerlalertussanut nunatta karsia kiffartuussinissamut isumaqatigiissutikkut qanoq annertutigisumik akiliuteqartalissava?
- Mittarfissat 900 mio.kr. saniatigut suli akisuneruleqqissinnaanerat naatsorsuutigineqarsinnaava?
Tunngavilersuutit:
Siullermik qujavunga akissutigineqartunut. Apeqqutikkali naammaginanngitsutut akineqarsorigakkit apeqqutinik nassiusseqqippunga, kissaatigalugu tigussaasunik uppernarsaaserlugit akineqarnissaat.
Mittarfeqarfiimmi Namminersorlutik Oqartussat ataanni inissisimammata aammalu nunatta oqaluttuarisaanerani aatsaat taamak annertutigisumik aningaasaliinerit pineqarmata paasissutissat kingunissallu tamaasa Naalakkersuisoqarfimmiit pinngitsooratik pigineqarlutillu misissorneqarsimanissaat naatsorsuutigigakku aammalu Naalakkersuisut ammasumik ingerlatsinissamik oqariartuuteqarsimanerat tunngavigalugu, paaserusutama pinngitsooratik akineqarnissaat kissaatigaara.
Apeqqutit akineqarnissaat ullut suliffiusut qulit iluini kissaatigaara.
[1]https://naalakkersuisut.gl/~/media/Nanoq/Files/Attached%20Files/Infrastruktur/Redegrelse%20om%20Kalaallit%20Airportsgrl.pdf