Asasakka ataqqinartut sulisartukkormiut tamassi

Sulisartut ulluanni tamassi qamannga pisumik pilluaritsi!

 

Siumumiit tulluusimaarutigaarput ukiuni kingullerni siuttuunitsinni suliffissaaleqisut 3.500 missaannik ikileriartinneqarsimammata. Tassuunakkut takutipparput qanoq sulisartukkormiunut aammalu nunatta suliffissanik aammalu inuussutissarsiornikkut siuariartornissaa suliffinnillu nutaanik aningaasatigut isaatitsivissanik qanoq pingaartitsiginerput.

Nunattami pisuussutai uumasut uumaatsullu tamarmik artorluarneqartariaqarput nunarput siuariartussappat. Oqaatsit kusanartut inuillu tusaarusutaat kisiisa aallaavigalugit nunarput siuariartuutaasinnaanngillat, kisiannili timitaliisinnaasuseq uuttuutaasariaqarpoq.

Inuiaqatigiittut aaqqissugaanitta annerpaartaa ilissinnit ilusilersugaavoq. Suna tamarmimi ingerlasinnaanngilaq ilissi ingerlaqataanngikkussi. Taamaattumik angisuumik takorluugaqartuarnissarsi tamatta pisariaqartipparput, sulisartukkormiunut pitsaasumik atugaqartitsinissatsinnut.

Toqqissilluni suliffeqarneq ilaqutariinnut pitsaasumik naammassinniffiusarpoq. Taamaattumik sulinermi sinaakkutaasut pitsaasut toqqissisimanartullu pingaaruteqarluinnarput, tamattalu inuiaqatigiittut pisussaaffigaarput sinaakkutit pitsanngorsartuassallugit.

Piffissaq ilaquttatsinnut atortagarput sulinissatsinnut nukissamik aallerfigisarparput. Taamaattumik sapaatip akunneranut akunnerni 40 tiimit sulisarnitta annikillisissinnaaneranik nalilersuisinnaasariaqarpugut, qanorlu tamatumap sulisartukkormiunut pilliutaanngitsumik aaqqiivigineqarnissaa ujartorlugu. Piffissarmi ilaqutariinnut meerartalinnut tunissutaavoq aningaasanngorlugu pisiarineqarsinnaanngittoq.

Aningaasarsianut akileraarummut inuttut ilanngaatip annertussusaa 2005-imiit allanngorsimanngimmat maanna sulisartut kaasarfimmiorisartagaat qaffanniarlugu pimoorullugu nalilersoqqinneqarnissaa sulissutigissavarput.

Ukiuni kingullerni Namminersorlutik Oqartussat inissiaataat INI-miit aqunneqartut akiisa qaffatsaaliornerat annertuumik ingerlassimasarput sulisartukkormiunut pitsaasumik illersuineruvoq. Kisiannili unammilligassaqarpugut, tassalu inissiat aserfallakkiartuinnarnerat ilisimavarput. Maanilu Nuummi aamma annertuumik unammilligassaqarpugut tassami sanaartornerujussuup kingunerisaanik ineqarnermut akit qaffasippaallaarujussualeqqapput. Taamaattumik Siumumiik ernumanartutut isigaarput massakkut annertuumik qanoq iliuuseqanngikkutta ukiualuit qaangiuppata Nuuk tassaalissasoq pisoorsuit tikisitallu kisimik najugaqarfigisinnaasaat. Taamaalisoqannginnissaa qulakkeerniarlugu uagut Siumumiik sulisartukkormiut kalaaleqatigullu illersorlugit tunngavissiueqataassaagut.

 

Naggataatigut Sulinermik inuussutissarsiuteqartut kattuffiata ukiuni 65-ini sulisartut atugarisaannik pitsanngorsaaniarluni suliaqartuarsimaneranut qujassuterput matumuuna apuukkusuppara.

Tamassi ullorsiorluarisi!

Qujanaq!

Scroll to Top