Frederik Olsen-imut eqqaaniut

Aliatsaatigeqisatsinnik ilisimatinneqarpugut Qeqqata kommuneani Siumut sinnerlugu kommunalbestyrelsimi ilaasortaq Frederik Olsen akornatsinniikkunnaarsimasoq.

Frederik Olsen ukiorpassuarni Siumumi ilaasortaavoq aammalu Siumut Sisimiuni immikkoortortaqarfiani siulersuisuni ilaasortaasarnermigut suleqataalluartarsimavoq,  qinigaaffimmi 2017-2021 Qeqqata kommuneani kommunalbestyrelsimi ilaasortaavoq.

Frederiup ilaasortaanermini ilisarnaatigilluagaasa ilagivaa suliaminut suugaluartunulluunniit tunniusimalluni aalajaallunilu aammalu suliaminut pimoorussilluarluni ingerlataqartarnini.

Frederik kommunalbestyrelsimi ilaasortaanermini ataatsimiititaliani assigiingitsuni ilaasortaavoq. Frederik suliamini tamani aammalu ataatsimiititaliani anguniagaqallaqqissutsini aallaavigalugu sulianut ilungersorluni sulisarnini ilisarnaatigaa.

Frederik sulinermini piumasaqaatikkaajuvoq aammalu tamatigut naapertuilluarneq aallaavigisarlugu. Inuk inoqatiminik sullissilluarnissaminut pingaartitsisoq siusippallaamik qimaguppoq.

Siumup siulersuisuuneri sinnerlugit Frederiup nulianut qitornaanut, arnaanut aammalu ilaqutaanut ikinnguterpassuinullu tamanut misiginneqataanerput matumuuna apuukkusuppara.

Frederiup eqqaaneqarnera ataqqinartuuli.

 

Erik Jensen

Siulittaasoq, Siumut

Scroll to Top