Landskarsi aningaasartuuteqarnerunavianngilaq

Mittarfittaassarsuit pillugit apeqquteqaammut Naalakkersuisunut ilaasortap Karl Frederik Danielsen-ip akissuteqaataa:

Mittarfissualiornerit pillugit § 37 naapertorlugu apeqquteqaammut 2021-027-mut
akissut.

Asasara Aqqaluaq B. Egede Inatsisartut suleriaasianni § 37 naapertorlugu mittarfissualiornerit pillugit Naalakkersuisunut apeqquteqaateqarputit.

Apeqqutitit uannit akineqartussatut innersuunneqarput.

Apeqqutitit matuma kinguliani ataasiakkaarlugit allanneqarput, akissummillu malitseqarlutik.

Apeqqut 1:

Mittarfissualiornerit inatsisartut aningaasatigut sinaakkusiussaat qaangerlugu akeqassappat?

 

a. Akissut aappiuppat, sooq taamaattoqassua?
b. Akissut naamiuppat, sooq taamaattoqassua?
Akissut:

2021-imi januaarip arfineq aappaani Aningaasaqarnermut Akileraartarnermullu Ataatsimiititaliaata akissut tulliuttoq, Kalaallit Airports pillugit isumasioqatigiinnermi ilisimatitsissutaasoq illillu apeqqutinnik akissuteqartoq, tiguaa:
“Inatsisartut ingerlatseqatigiiffimmi aktianut aningaasaleeqataassutissanut killiliussanik, 2,1 mia. koruuninik naleqartunik aalajangersaasimammata ilumoorpoq. Killiliunneqartut taakku qaangerneqanngillat aammalu qaangerneqarnissaat
ilimagineqanngilaq. Taamaattumik suliassanut aningaasaliissutissat sinnerisa taarsigassarsinikkut pissarsiariniarnissaannut Inatsisartut pisussaaffeqanngillat. Taakku soorunami ingerlatseqatigiiffimmi taarsigassarsinikkut pissarsiarineqassapput.”

 

Neriuppunga qulaani allaqqasuni apeqquteqaatitit akineqartut. 

Inussiarnersumik inuulluaqqusillunga

Karl Frederik Danielsen

Scroll to Top