Partii

Partiip Siunertaa

 

Siumup anguniarpaa naqisimaneqanngitsumik inuillu susassareqatigiillutik ikioqatigiillutillu ineriartornissaannik eqarsartaatsip siammariartortinneqarnissaa akuerineqarnissaalu, partiip naalakkersuinikkut anguniagai tunngavigalugit, aningaasarsiornikkut piorsarsimassutsikkut naalakkersuinikkullu soqutigisat tunngaviusumik anguniakkat isummiussallu aallaavigalugit:

1. Pilersikkumallugit inuiaqatigiit ataqatigiissut, ilatsiinnartuunngitsut, kisiannili eqeersimaartut napasinnaalluartullu, inuiaqatigiittut akisussaaqataanertik qamuuna misigisimalluarlugu                                                                                                                                                                                                                                                 ilumoorfigalugulu innuttaaqataasut.

2. Pilersikkumallugit inuiaqatigiit nunamik tunniussinnaasai akisussaassuseqartumik atorluarlugit avataaniillu pisut pisariaqartitatik iluaqutigalugit imminnut napatissinnaalerlutillu aqussinnaalersimasut

3. Pilersikkumallugit Nunatsinni inuiaqatigiit kikkunnut tamanut pitsaasumik atugassaqartitsisut naligiimmillu periarfissaqartitsisut.

4. Pilersikkumallugit Nunatsinni inuiaqatigiit naligiissitaaffiusut apeqqutaatinnagit sumi inunngorsimaneq, arnaaneq, angutaanerluunniit kiisalu sumilluunniit upperisaqarneq.

5. Nunatsinni avatangiisit isumalluutillu uumassusillit piujuaannartitsineq aallaavigalugu nungutsaaliuinikkut paarilluarneqarnissaat.

6. Nunatsinni inuiaqatigiit akisussaassusermik, eqeersimaarnermik peqqinnermillu pingaartitsillutik kiffaanngissuseqarlutillu ineriartornissaminnut pitsaasumik periarfissaqarnissaat.

7. Pilersikkumallugit Nunatsinni inuiaqatigiit nunarsuarmioqataasutut unammillersinnaasumik ilinniartitseriaaseqartut.

8. Pilersikkumallugit Nunatsinni inuiaqatigiit aningaasaqarnikkut politikkikkullu nammineersut.

9. Kalaallit Nunaata aqunneqarnerani ammasumik inuillu oqartussaaqataanerat pingaartillugu ingerlatsineq nukittorsassallugu.

10. Kalaallit Nunaanni Inuit pisinnaatitaaffii nunarsuarmioqatigiinnut tamanut atuuttut illersussallugit.