Qanittukkut Danmarkimi Børsen ikuallammat nunatsinni aamma maluginiarneqarpoq, pineqarmat taakku kulturikkut eriagisaat, illorsuaq ukiut 400-t sinnerlugit napasimasoq. Ilutigisaanik uagut kulturikkut eriagisassagut asiutikkiartortippavut
All.: Doris J. Jensen, Inatsisartunut ilaasortaq
Nammineq kulturigisaq ilisimassallugu pingaaruteqarpoq, tassami kikkunnut atanermut paasinnittariaatsimut pingaaruteqarluni inissisimavoq. Inuiattut oqaluttuarisaanerput eqqarsaatigissagutsigu katersugaasiveqarnerput pingaaruteqarluinnarluni inissisimavoq. Assinganik pingaaruteqartigaaq katersugaasiviit kulturikkut eriagisatsinnik katersaqarlutik ingerlatsisut politikikkut tapersersorneqarnissaat.
Ukiorpassuanngulersunili politikeritut sulininni tapersersuineq eriagisassatsinnillu pingaartitsineq naammaqqajartanngitsoq maluginiartarpara. Ulloq manna tikillugu inuiattut ima inissisimavugut, kulturikkut eriagisassagut naammattumik isumannaarsimanagit. Ilarparujussui Nunatta Katersugaasiviata qaliani isugutatsinneqarlutik piuneerutsikkiartorneqarput, ilarparujussuilu nunani allani inissisimatinneqartut uaniluunniit tikissanngilakka.
Isumaqartarpunga pingaartumik Nunatta Katersugaasivia Allagaateqarfialu nukittorsarneqartariaqartoq. Taamaammallu 2022-mi majimi Inatsisartunut siunnersuutigaara, ullutsinnut naleqquttunik toqqorsiveqalernissaq siunertaralugu, toqqorsivimmik sanaartornissamut pilersaarusiulernissaq aallarteqqullugu aningaasaliisoqartariaqartoq.
Tamanna Inatsisartuni ilalerneqarpoq, Naalakkersuisullu suliakkerneqarput Nunatta Katersugaasiviani toqqorsiviit nutaat pilersinneqarnissaat pillugu, suliassatut pingaarnertut ilaattut inisseeqqullugit.
Isumaqarpunga Børsenimi ikuallattoorneq nunatsinni aamma malugineqartoq tamatsinnut oqariartoraluartoq, eriagisassat qanoq pingaaruteqartigineranik aammalu uaguttaaq kulturikkut eriagisagut pimoorunnerullugit ingerlatsilluta pisussaaffeqartugut.