All.: Anders Olsen, Inatsisartunut ilaasortaq
Narsarsuup mittarfittut ukiorpassuarni pitsaasumik ingerlasimanera aammalu angallattut najugaqartullu atugassaqarnerisa pitsaasumik ingerlasimasut eqqarsaatigalugit, maanna pitsaassuseq katalluinnalersimasoq kingumut pitsaassutsiminut utertinneqartariaqartoq isumaqarpunga.
Qaqortumi mittarfissap atulerneqarnissaa pilersaarutit malillugit suli ukiut marluk sinnerlugit aatsaat pisussaavoq, taamaammat nunatta kujataa eqqarsaatigalugu Narsarsuup angallannikkut assartuussinikkullu qitiusumik inissisimanerata pitsaassutsikkut ajunngitsumik inissisimanissaa pingaaruteqarpoq.
Mittarfimmi akunnerpassuit utaqqinermi kioski matoqqatinneqartoq, kioski ammagaluartoq pisiassaatimigut ikittuinnarnik pilik, akunnittarfimmi init ilaatigut pitsaanngitsut, attaveqaasersuutit ullutsinnut naleqqutinngitsut, akunnittarfinni nerisassat killeqangaartut, Narsarsuarmi najugaqavissut ilaatigut akunnittarfimmi nerisinnaasannginnerat, Pilersuisumi inuussutissatigut pilersorneqarneq killilik, poortukkat assartukkallu ullorpassuarni Narsarsuarmiitinneqartartut, napparsimasut nakorsiartullu angallanneqarneranni isumaginninnerup pitsaanerusinnaanera ilaalu ilanngullugit ulluinnarsiutinngorsimanerat qanoq iliuuseqarfigisariaqarluinnalerput.
Mittarfeqarfiit pisussaaffeqarput atugassarititaasut akisussaaffigisatik piaartumik aaqqiivigissallugit, taamaammat Naalakkersuisut erngertumik iliuuseqarnissaat kissaatigaara, aasaaneranimi angallannerit annertuut ungasinngitsunnguakkut aallartittussaapput.
Narsarsuup tikiffigiuminarlunilu najoruminartuunissaa qulakkeerneqartariaqarpoq.